الغرب و المرأة
وايد نسمع ان المرأة في العالم العربي مظلومة و مسلوبة حقوقه و ينادون بمساواتها بالمرأة
في الغرب لكن اشاهد الكثير من التناقض بالواقع
فالكثير من المواقف اشاهدها امام عيني تدفعني الى ان احمدالله على وضع المراة عندنا في العالم العربي
مثلا امس كنت رايحه مشوار و كان الجو مطر و هوا و عفسه حده و في مراة سيارتها واقفه في الشارع عندها التاير مبنجر محد وقفلها يساعدها رحت و رديت يعني ساعة تقريبا و اهيا للحين ناطرة و محد وقف يساعدها حتى ....... لو
عندنا بالكويت جان السياير طابور يبون يساعدونها
موقف ثاني رفيجتي وقفت سيارتها بالطريج و اهيا ما تعرف شيء حق السيارة نطرت
يمكن 45 دقيقة محد فكر يوقف يسألها اذا تبين مساعدة و بعد هل وقفه غصب واحد رضى يساعدها بس اول شيء قاله اساعدج بس عطيني فلوس يعني لو ماراح تدفعله راح توقف بالشارع و محد راح يساعدها فكان لازم تدفعله
صج لما اشوف هل مواقف او اسمع عنها احمدالله على العز الي بالكويت المرأة معززه مكرمه و ما تتبهدل نفس الغرب
و دايما في احد يساعدها سواء من اهلها او من اهل الديرة اللي ما يقصرون
posted by q8ty-dr @ 2:07 AM
9 Comments:
At 3:23 PM,
3ateeja said…
عندي بوست اسمه ام نبيل
اقراه :)وبتلقى جوابي
At 5:25 PM,
ReLaaaX said…
يابعد قلبي والله ،،
صج احنا بنعمة ربي لك الحمـــد
ماعليج منهم هاللي عندنا بس يتعنفقون وجنهم يهالووه كل ماشافو شي قالو نبي مثله !!؟ ربي لك الحمد
آنه وحده أقول مابي مساواة بين الريال والمرة .. مو لأن المره أقل من الريال بس لأن خلقة المره تختلف وطبع المره يختلف
باختصار
يكفيني فخراً أنني امرأة
At 9:42 AM,
q8ty-dr said…
عتيجة : و الله انج مغامرة ماشاء الله عليج و مسكينه ام نبيل خليتيها تدز السيارة فقيرة .... هذا المصري نفس الي هني يشوفونج جنه مسرحية اي تعالوا ساعدوا
ريلاكس : مثل ما قلتي المراة غير عن الريال كل واحد منهم له ميوله
يعني ما يستهويها ميكانيكا السيارات و سوالفها مخلينها حق الريال :p
At 9:49 AM,
esTeKaNa said…
تعالي شوفي عيال الكويت هاليومين
توقفين ساعه كل من يطل بويهج
اذا ياز له موديلج وقف
واذا ما ياز له ابتسم وتوكل على الله
:)))
بس اكيد ديرتنا فيها لخير والحمدلله على كل حال،عسى الله يحفظكم يارب انتي ورفيجاتح وكل بناتنا برة الكويت
At 3:23 AM,
Hosno said…
موافق معاج 100 % لأن احنا العرب عندنا غيره على النساء حتى لو مو من اهلنا والفكره الى ماخذينها عن الغرب نصها غلط انتي شوفي ابسط شي المره لو تصرخ بالشارع عندنا مليون واحد يي يشوف شفيها وبالغرب يعطونها طاف
موفجه انشالله يا دك
At 5:04 PM,
3ateeja said…
This comment has been removed by a blog administrator.
At 5:07 PM,
3ateeja said…
ودام المره كاسره خاطرج ليش ما وقفتي ساعدتيها؟؟؟
At 9:22 PM,
q8ty-dr said…
استكانه : كلامج صح بس بالاخير راح يساعدونج و ما يقصرون و هذا المهم
hosno :
هلا فيك في البلوق .... صح ماكوا غيرة
على المرأة في الغرب
عتيجة : ياريت اقدر اساعدها المشكلة ان ما اعرف ابدل التاير فان شاءالله ما انحط بهل الموقف علشان ما اتوهق
At 3:41 AM,
الاء سعود المجيبل said…
الحمد لله ان احنا مسلمين...:)
Post a Comment
<< Home