الغرب و المرأة

وايد نسمع ان المرأة في العالم العربي مظلومة و مسلوبة حقوقه و ينادون بمساواتها بالمرأة

في الغرب لكن اشاهد الكثير من التناقض بالواقع

فالكثير من المواقف اشاهدها امام عيني تدفعني الى ان احمدالله على وضع المراة عندنا في العالم العربي

مثلا امس كنت رايحه مشوار و كان الجو مطر و هوا و عفسه حده و في مراة سيارتها واقفه في الشارع عندها التاير مبنجر محد وقفلها يساعدها رحت و رديت يعني ساعة تقريبا و اهيا للحين ناطرة و محد وقف يساعدها حتى ....... لو

عندنا بالكويت جان السياير طابور يبون يساعدونها

موقف ثاني رفيجتي وقفت سيارتها بالطريج و اهيا ما تعرف شيء حق السيارة نطرت

يمكن 45 دقيقة محد فكر يوقف يسألها اذا تبين مساعدة و بعد هل وقفه غصب واحد رضى يساعدها بس اول شيء قاله اساعدج بس عطيني فلوس يعني لو ماراح تدفعله راح توقف بالشارع و محد راح يساعدها فكان لازم تدفعله

صج لما اشوف هل مواقف او اسمع عنها احمدالله على العز الي بالكويت المرأة معززه مكرمه و ما تتبهدل نفس الغرب

و دايما في احد يساعدها سواء من اهلها او من اهل الديرة اللي ما يقصرون

من ذكريات الطفولة

ذكريات الطفولة من احلى الذكريات التي تمر على بالنا

تذكرون جكليت بو بقرة الي فيه احمر و اصفر

اذكر نلعب حيله عند باب البيت و كل ما احد دش انزفيناه

اذكر ان كنت وايد اتهاوش مع عيال خالتي الصبيان و اذا قعدت ابجي ادق على ابوي .... صج دلوعة

تذكرون كاكاو كادبوري البنفسجي وفليك اشلون كنه اذا احد راح لندن نوصيه و الحين مكود و ما نجرب يمه

اذكر ايام كنت بالمدرسة و مشتركة بالزهرات واي كانت ايام تونس و خصوصا لما يكون العيد الوطني و نطلع بالشارع

مع الاعلام واقفين على طول الشارع و الله ايام

اذكر ليلة العيد كنا يحليلنا نحني ايدينا و يربطونها علشان ما ندمر شيء و عقب ما نغسلها تعورنا من كثر ما كانت مربطه

اذكر لما كنت بالاذاعة بالابتدائي و المتوسط يحليلي ما كنت استحي الحين احس انا ما عندي الجرأة اني اتكلم بالميكرفون

تذكرون حليب الموز و الفراولة الي كانوا يعطونا بالروضة صج كنت احبه

تذكرون الكشاكيل الي كانوا يعطونا اياها عليها صورة بابا جابر الله يرحمه .... كنت استانس عليهم حتى كنت خاشه جم

واحد بس للاسف ضاعوا لما نقلنا بيتنا

اذكر ايام العيد هبوا فترة بالجناط المدورة الي مثل صندوق تذكرونهم ؟؟ كانوا حد الكشخه

وااااايد ذكريات لنا لقاء مع جزء ثاني